Текстове на песни: Surghjenti. Orma. U Francà Di I Staghjoni.

Spadanscia a me muntagna suttu a a vampa di lu soli.
U mintrastu 'llu so adori incurunighja lu matticciu
Chi s'infiara supra a a frasca 'llu manteddu castagnicciu
A sinu a la rinfriscata di una nuttata di foli,
Cu l'eternu passatempu di lu celi di l'istati
Chi m'arriga lu sirenu 'lli so steddi suminati.


Invechja a me muntagna in un vistitu russicciu.
U muscu di i meli, posti in a filetta sicca,
Accarezza incu dulcezza u paesu chi rinfrisca
Gudendu si lu raghju di u soli tricaticciu,
Quandu a sarra pianu pianu si tira un velu grisgignu
Nantu a a vaddi chi cuntrasta incu lu chjarori vicinu.


S'ingrunchja a me muntagna suttu a a nivi chi si chjina.
A l'aggrottu di lu vetru, affuscatu di vapori,
Schjuppittighja un biacculonu chi rigala u so calori ;
Al di fora u celi grisgiu pari fala ni in pulvina.
U cunfortu di una casa ghjeiu so quant'iddu vali
Quandu in un dulci silenziu s'accampa lu timpurali.


Rinvivisci a me muntagna in una carezza verda.
L'amanduli sbucciati chjamani li biniditti,
Cola lu russu suchjosu 'lli chjirasgi amaretti,
Luntanu frivaghju scuru e li so ghjurnati friti !
Da tandu un sulcu tiratu da spiranza a li me sogna :
Imbiddisci mi la vita chi accarezza li me ghjorna.


Un muta la me muntagna franchendu tanti staghjoni.
Ghjeiu invechju a fiancu a idda fendu li da tistimoniu,
Tutti l'anni chi s'ammansani maturiscini u me campa,
E cun tegu, a me cumpagna, quiddu mondu voddu varca.